Draft Day - 6/10

Draft Day is nogals nie sleg nie, veral omdat ou Kevin nog nie sedert Dances with Wolves weer iets skaflik kon maak nie. Eenvoudige lyn, maar  tog met 'n lekker spanninglyn. Baie kykbaar, vir die hele familie, maar daar is tog 'n paar woorde wat pla. Saam met die familie op die bank.

Belle - 7/10

Belle het aanvanklik na 'n redelik swaar tema geklink, maar dit word op 'n heelwat ligter trant aangebied, amper in die lyn van Downton Abbey. Baie kykbaar, ek verstaan nou hoekom dit so lank op die kunskring gedraai het. 'n Soete liefdes intrige, in 'n benydenswaardige milieu, en sekerlik met die mees stylvolste vervoermidelle denkbaar. Kan enige aand werk, selfs op 'n Sondagaand. Saam met Bella op die bank.

Godzilla (2014) - 6/10

Godzilla is nogals nie te sleg nie, heel bo verwagting. Die ongedierte gevegstonele heel kort en aanvaarbaar. Die fliek is dalk so ietwat aan die lang kant, maar dit pla ook nie te veel nie. Die karakters en vertolkings is baansyfer. Kyk gerus met 'n lekker groot bak gepopte mieliepitte op 'n Vrydag of Saterdagaand. Saam met die familie op die bank.

X-Men: Days of Future Past - 7/10

X-Men: Days of Future Past is onverwags lekker om te kyk. Die gevegstonele is nie langdradig nie, die lyn gepas. Daar is ook humor, veral met die man wat teen die spoed van witlig goeters kan doen. Kyk gerus, lekker naweek materiaal. Saam met Bella en Franko op die bank. Anrich het stukke saam gekyk. 

Blended - 5/10

Blended is tipiese Sandler materiaal, baie lig, en die gewone raak-aan-die-belt grappe. Tog snaaks en lekker Saterdagaand materiaal as mens net wil ontspan. Saam met die familie op die bank.

Wrath of the Titans - 4/10

Wrath of the Titans is dalk swakker as die voorganger, maar seker darem tot 'n mate kykbaar. Nou nie my eerste keuse vir 'nb Vrydagaand nie. Van die tonele raak bietjie lank. Saam met die familie op die bank.

Mr. Peabody & Sherman - 7/10

Mr. Peabody & Sherman is 'n lekker familie fliekie om te kyk, lig, vol slinkse kwinkslae en 'n goeie les of twee. Kyk gerus saam met die hele familie, die verwysings na geskiedkundige figure is baie skerp. Dit is veral die Spartane wat vermaak lewer... Saam met die familie op die bank.

Outlander, Seisoen 1 - 6/10

Outlander het 'n redelik stadige eerste episode, sal dit nog 'n kans gee. Iets anders as die gewone. Saam met Bella op die bank.

The Amazing Spider-Man 2 - 7/10

The Amazing Spider-Man 2 is dalk die beter weergawe tot nou. Dit het relatief kort aksie tonele en bietjie meer tong-in-die-kies tonele as gewoonlik. Baie meer toeganklik vir die vroulike mark, so kyk gerus saam met jou beterhelf. Saam met die familie op die bank.

The Zero Theorem - 5/10

The Zero Theorem begin met 'n redelik chaotiese toekomsvisie, en is vol onderliggende verwysings na geloof, werk, die sosiale bestel en gemeenskap in die algemeen. Dit is veral die donker skets van die soeke na doel wat opvallend is. Die fliek rafel so ietwat uit, maar is tog kykbaar. Dalk vir die meer oopkop fliekganger bedoel. Beslis een van die meer vreemde films die afgelope ruk. Saam met Bella op die bank.