I Want Someone to Eat Cheese With - 2/10

Aag flip, nee, nog 'n moewie met 'n indrukwekkende titel wat regtig maar baie flou is. Gelukkig is dit darem nie 'n disfunksionele spul soos in Running with Scissors nie. Dit het seker een grappie in wat snaaks genoeg is om te glimlag, maar dis dan ook dit. Dis net 'n eentonige, flou, een-direksionele dialoog van lee observasies en nikseggende kommentaar. Nee wat, vermy eerder. Saam met Bella en Hester op die Bank. Jammer, Hes, jy wou 'n laaste moewie kyk voor jy terug London toe is, en toe is hierdie een so flou.

Genova - 4/10

Wel, selfs ou Colin kan nie hierdie fliek lig tot wat dit bedoel was om te wees nie. Alhoewel die karakters almal voortreflik vertolk word, voel die film uiteindelik leeg en kaal. Daar is 'n stadige spanningslyn, amper onvoelbaar, wat tot niks uitloop nie. Die film probeer ook nie die verwagting skep van 'n skerp lyn nie, maar dit was tog die gevoel wat die voorprent voorgehou het. Saam met Bella op die (see)bank.

The Ramen Girl - 5/10

Redelik gemiddelde tjiekfliek met 'n ietwat stadige lyn en minder aksie. Dit hoort dan seker ook so om die Japanese kultuur te beklemtoon. Dit is darem kykbaar, maar hier en daar kan mens dalk wel bietjie verveeld raak. Saam met Bella op die (see)bank.

The Boat that Rocked - 7/10

Britse komedie op sy stukke. Lekker storie, snaakse dialoog, uitstekende vertolkings, mooi meisies, perfekte milieu en op Mamma Mia! na, een van die beste klankbane wat daar is. Hoogs aan te beveel as jy so optellertjie nodig het. Dit sal vir enige aand werk. Saam met Bella op die (see)bank.

Funny People (2009) - 5/10

Hierdie is nie dieselfde as Jamie Uys se Funny People (1977) nie. Dit het 'n paar baie snaakse stukke, maar vrek baie vloek, egter soos verwag van stand-up komedie. Dit is nie Sandler se beste fliek nie. Click is waarskynlik die beste een so ver. Die fliek is heeltemal te lank, en meng twee stories wat nie regtig werk nie. Saam met Bella op die (see)bank.

Shorts - 7/10

Baie verfrissende kinderfliek wat ook sommer 'n gesonde dosis sosiale kommentaar lewer tesame met 'n lewenslessie of twee. Kort en interessant genoeg vir die hele familie saam. Het nogals 'n interessante tydlyn benadering, en daar is heelwat snaakse stukke. Saam met die familie op die (see)bank.

State of Play - 5/10

Gemiddelde fliek in die sameswerings genre met 'n ietwat ongeloofwaardige finale. Beide Affleck en Crowe speel nie te sleg nie, maar ten spyte daarvan verveel die fliek tog 'n bietjie. Kyk gerus as daar nie iets anders op die rak is nie en jy nie veel aksie verwag nie. Saam met Bella op die (see)bank.

Enemy at the Gates - 7/10

Enemy at the Gates is al baie lank op my lysie van flieks wat ek nog graag wou sien. Saam met moewies soos Memento en Down Periscope. Ou Jude is een van my gunsteling akteurs, en alhoewel hy dalk bietjie saggies voorkom vir 'n oorlog fliek, werk hy tog in hierdie een. 'n hardebaard akteur sou dalk beter gewerk het. Die fliek het egter 'n goeie spanningslyn. Die sleg van oorlog en mense wat oorlog maak is maar 'n fokuspunt, maar trek nie die aandag van die hooflyn af nie. Kyk gerus, maar wees maar reg vir oorlog. Saam met Bella op die (see)bank.

Running with Scissors - 3/10

Nee wat, dit is een van daai destruktiewe disfunksionele familie dramas oor mense met allerhande vreemde fieme. Vermy dalk eerder tensy jy wil sien hoeveel probleme ander mense het. Ek het al soortgelryke flieks gesien maar hierdie een werk net nie. Dis nogals jammer, want die titel klink vrek fensie. Saam met Bella op die (see)bank.

Book of Love - 5/10

Book of Love is nie 'n te slegte drama nie, maar soos Bella reken, is dit minimalisties. Tog kykbaar en sonder veel aksie. Dit sal werk as 'n Sondagaand opsie. Mens gaan nou nie juis aan die storielyn herkou of dit veel onthou nie - dit skep nie noemenswaardige indrukke nie. Saam met Bella op die (see)bank by Winkelspruit.

The Secret Lives of Second Wives - 3/10

The Secret Lives of Second Wives is 'n fliekie wat net op televisie vrygestel is. Dit is darem net-net kykbaar maar tog heelwat dooierig. Dit lyk amper soos een van hierdie nuwe feel-good flieks, met die verskil dat daar nie geloof begetrek word nie. Dit probeer wel een of ander morele les uitbeeld. Moet nie dit van die DVD rak afhaal nie - vat liewers iets anders. Saam met Bella op die bank.

I Hate Valentine's Day - 4/10

I Hate Valentine's Day is dan seker 'n tjiekfliek. Dit probeer volg op die onverwagte, weghol sukses van My Big Fat Greek Wedding, maar hou beslis nie by nie. Nie te sleg om te kyk nie, maar dit is maar stadig en die storie baie eenvoudig. Nee wat, hou maar eerder verby vir iets met meer oempa, komedie of iets dergliks. Saam met Bella op die bank.

The Burning Plain - 6/10

Nog 'n Charlizie fliekie, maar darem nie so erg soos Monster nie. The Burning Plain is nie 'n tjiekfliek nie, maar is darem 'n liefdesverhaal. Dis ook meer 'n drama, maar tog kykbaar. Moet egter nie 'n hoe" energie fliek verwag nie. Dit is eerder stadig en maak van 'n baie kort einde gebruik, wat dalk nie so geslaagd is nie. Die fliek is seker darem beter as gemiddeld. Moet dit nie as Vrydagaand vermaak beskou nie - eerder 'n Sondagaand opsie. Saam met Bella op rekenaar.  

Bao hu lu de mi mi (The Secret of the Magic Gourd) - 5/10

The Secret of the Magic Gourd lyk my is eintlik 'n Singapoerse kinderfliek met die titel 'Bao hu lu de mi mi'. Ek het nou wel nie kans gekry om die hele fliekie deur te kyk nie, maar dit lyk darem goed vir die kortvolk. Die visuele kwaliteit van die fliek is nogals elegant-skoon en die bamboeswoud is pragtig in sy eenvoud. Saam met Bella op die bank, nadat die kortvolk dit gekyk het.

District 9 - 8/10

Ek het met groot afwagting hierdie een saam met Bella by die DVD winkel geboek. District 9 speel in SA af, en maak van al die geskiedenis gebruik vir 'n bepaalde effek. Aag vrek, daar kom dit toe nie vanaand in soos beplan nie, nou is dit vir more aand geboek.

Die fliek is vir my te eerlik as wetenskapfiksie vermaak. Die direkte verband met pre-94 SA is ook net te sterk. Dit is wel 'n teksboek geval van hoe mens vernuwing doen in 'n redelik uitgetrapte genre. Tegnies is dit puik, alhoewel dobberende kamera skote glad nie met my vestibuler saam werk nie. Gelukkig word dit al minder teen die einde soos wat die storie van dokumentere styl wissel na gewone teatrale styl. Wikus se vrou kon beter speel, maar Wikus is eerlik in sy vertolking. Vir 'n slag is die SA Engels korrek in 'n internasionale film. Mens moet ook verkieslik nie eers springmielies eet as jy hierdie een kyk nie, al probeer hulle so bietjie pulp fiksie naboots. Saam met Bella op die bank, wat na so paar minute die aftog geblaas het.

Four Christmases (Anywhere but Home) - 5/10

Four Christmases, ook bekend as Anywhere but Home, is 'n Kersfliekie, soortgelyk aan The Holiday en Love Actually. Dit val egter nie heeltemal in dieselfde genre as laasgenoemde twee nie. Dit is nie die beste fliek van die jaar nie, en is maar vol van die gewone cliches. Wat dit so effens van die res onderskei is die goeie humor tydberekenings. Die grappe ken mens al, maar vrek, daar is 'n paar goeie interpretasies wat my lekker laat lag het. Dit is perfek as Vrydagaand "ont-werk" middel. Ek was redelik baie moeg teen die tyd dat ons begin kyk het, maar het nie aan die slaap geraak nie - dit was te snaaks. Saam met Bella op die bank.

Transformers: Revenge of the Fallen - 4/10

Nee wat, hulle sal iets beters en nuuter moet uitdink om te verbeter op die eerste Transformers. Daar is meer en groter masjiene, maar dit help nie. Selfs die lieflike Megan Fox red nie die fliek nie. My twee laaitjies het dit heel geniet. Ek dink wat ook kort is dalk die gebruik van goed berekende humor. Die eerste een het dit beter reggekry. Saam met die Familie op die bank. Bella het nie eers die fliek klaar gekyk nie.

Chaos Theory - 7/10

Chaos Theory was sover ek weet nie eers op die kringloop gewees nie. Dit is 'n heel kykbare tjiekfliek met 'n ietwat anderse reseppie en verfrissende benadering. Dit lyk soos 'n komedie aanvanklik, maar is dalk so bietjie meer ernstig. Met taamlik onbekende akteurs maak dit nie staat op hoostroom geldtrekkers nie. Was aangenaam verras met hierdie een. Soortgelyk aan The Hangover, laat dit mens hier en daar nogals meevoel met die kwaai misverstande wat ontstaan. En vrek, die man het 'n baie sterk wil om die honeytrap blondine te systap... Saam met Bella op die bank.

Terminator Salvation - 4/10

Die nuutste weergawe van die Terminator reeks, Terminator Salvation, is nou nie die beste fliek nie, en draai maar baie om die skiet van goeters, sonder te veel van 'n storie. Dis ook moeilik om te se of hierdie beter of slegter as die voriges is. Van die spesiale effekte is nogals lekker om te kyk, maar dis ook waar dit stop. Ten minste het die vorige weergawe, Terminator 3: Rise of the Machines, Kristanna Loken in gehad. Saam met Bella op die bank.

Earth - 9/10

Ek is iemand wat nogals baie van natuur dokumentere hou, en het al heelwat gesien. Een van my gunsteling reekse, is The Trials of Life, wat deur David Attenborough aangebied word. Hierdie een, Earth, is nou wel nie so tegnies en vol inligting soos Trials nie, maar het van die mooiste tonele wat ek nog ooit gesien het oor ons ou planeetjie in. Die samestelling is puik en mens raak verdiep in die pragtige tonele, maar ook soms hartseer tonele. Beslis aan te beveel vir natuurliefhebbers. Saam met die familie op die bank.

John Doe (Episodes 1-21) 6/10

John Doe (Sien ook Wikipedia: John Doe) is nie 'n te slegte reeks nie, maar eindig maar redelik stomp en dalk selfs teleurstellend. Die reeks is gekanselleer, en daar is dus geen opvolg nie. Die einde is tipies so gekryf dat 'n opvolg reeks half noodsaaklik is.  Die episodes is almal redelik interessant, en kyk heel gemaklik. Ek het nogals gesoek vir die reeks op DVD, maar kon dit nerens kry nie, seker maar omdat dit net na Noag uit die ark gekom het (2002). Ons het dit dus op rekenaar gekyk - nie op die groot skerm of die gemaklike bank nie (ek het nog nie een van daai fensie boksies vir AVIs nie). Daar is ook 'n verkyning of twee van Gabrielle Anwar, sy is nog uit die dae van Scent of a Woman. Wie kan nou die pick-up line van blinde Al Pacino vergeet?

The Great Buck Howard - 5/10

The Great Buck Howard is skynbaar losweg gebaseer op 'n ware verhaal. Ek is net so seker of die wille handskud van ou Buck op feite rus nie. In elk geval, 'n redelike interessante film, maar daar is nie juis 'n spanningslyn of veel ander opwinding nie. Emily Blunt sorg darem vir so bietjie romanse, maar selfs dit is maar min in terme van aksie. Moet nie hierdie uitneem as jy baie verwag van 'n film aand nie. Dit kyk amper soos 'n dokumenter, maar is beslis nie een nie. John Malkovich speel soos verwag redelik goed, maar hierdie is dalk te veel dieselfde as van sy ander rolle. Die fliek neem dus eerder 'n John Malkovich baadjie aan, as wat John die hoofkarakter aanneem.... Saam met Bella op die bank.

Management - 6/10

Management is nie 'n gewone tjiekfliekie nie, en is ook met een van my gunsteling aktrises, ou Jen. Sy het darem glad nie 'n te slegte lyf vir haar ouderdom (40+) nie... In elk geval, terug tot die amper art-house, alhoewel baie ligte, tjiekfliekie. Soos Bella se^, dit is 'n fliek van onperfekthede, veral as mens dit met gewone Hollywood sou vergelyk soos byvoorbeeld The Proposal. Laasgenoemde het alles perfek, die mense, die gebeure, die plekke. Steve speel baie goed, en mens kry hom half jammer. Moet se^ dat ou Woody ook 'n baie goeie ondersteunende vertolking doen. Daar is 'n paar histeries-snaakse tonele, veral die een met die boude.... Saam met Bella op die bank. Lekker vermaak vir 'n bietjie meer denkende Vrydagaand.

Knowing - 4/10

Knowing is maar gemiddelde Nicolas Cage vermaak, eintlik maar so bietjie onder gemiddeld. Van die spesiale effekte is nie te sleg nie. Die storie is maar dun. Redelike Vrydagaand vermaak. Saam met Bella op die bank.

The Proposal - 5/10

Nou ja, wel, hierdie is maar die gemiddelde common garden variety tjiekfliek. Watshaarnaampie sal seker hierdie tipe fliek tot nog na 'n hele paar gesigontrippelings doen. Dit kyk darem nie te sleg nie, en die twee meer snaakse stukke is nie te sleg nie. Me Bullock lyk ook glad nie te selg vir haar ouderdom (45) nie, al keer sy soos 'n topkolwer vir haar wickets... Saam met Bella op die bank.

Star Trek (2009) - 7/10

Star Trek is maar nog altyd 'n groot gunsteling, vanaf Kaptein Kirk na Picard en nou na die nuwe manne. Moet se^ dat nadat ek die ekstra stukke op die DVD gekyk het, en die regiseur die kommentaar gelewer het dat hulle so bietjie by Star Wars geleen het, besef ek dat die pas van die film dalk heelwat vinniger is, as die gewone Star Trek episode. Dit is egter lekker om hierdie weergawe te kyk, en mens is half teleurgesteld as dit eindig. Ek moet ook se^ dat die modernisering van die moederskip met smaak en sensitiwiteit benader is, en dat genoeg cheesy dialoog oor is, ten spyte van die nuwerwetse slang. Dit is beslis aan te beveel, en die wag vir die DVD was die moeite werd. Saam met Bella op die bank.

Up - 7/10

Up is nou wel animasie, maar dit is meer op groot mense gemik as kinders sou ek reken. Die storielyn is heel kreatief, en baie anders as wat mens verwag as jy begin kyk. Dit het so drie sterk temas wat deurkom, en dan nog 'n paar ander by: oudword, omgee en kinders grootmaak. Dan is daar die amper mitologiese voe"l wat die rondte doen.....anders se^ ek mos as wat mens verwag....Die humor is ook goed, maar speel minder van 'n rol, dit is eerder die erge realisme van oudword wat die fliek oorheers.....Saam met Anrich in die teater vir 'n slag, en toe so wraggies waar is die klank in ons Ster Kinekor weereens bekonkeld - dit is seker nou die sewende keer in 'n ry wat ek gaan fliek dat daar iets fout is. Dit is hoekom ek al minder gaan fliek en eerder wag vir DVDs...En dan is daar die erg duur springmielies en koeldrank ook nog. Nee wat, as Ster Kinekor wil he^ mens moet eerder gaan fliek in die teater as om by die huis gemaklik - sonder probleme - te fliek, sal hulle beslis 'n plan moet maak.

Jackpot - 3/10

Nog een van daai feel-good-moewies - mens kry nie eers die titel op IMDB of die internet nie. Dit is erg amateuragtig, maar dan met 'n storie wat veronderstel is om mens 'n baie belangrike lewensles te leer. Dit bereik seker wel die laasgenoemde, maar nou ja, mens kan ook net soveel toelaat. Saam met Bella op die bank.

Monsters vs Aliens - 5/10

Nie te slegte animasie nie - die fliek kyk nogals lekker, veral saam met die jongspan. Niks nuuts in terme van storie of tegnologie nie. Daar is 'n paar regtig snaakse stukke, en die jellieman is tog ook snaaks. Saam met die familie op die bank.

The Brothers Bloom - 6/10

Aag vrek, ek was net te moeg om hierdie waarlik te kon inneem - dit is kunsfliek komedie op sy beste, maar met 'n goeie skoot traan daarby. Adrien Brody het 'n manier aan hom wat net werk. Ek het al van sy ander flieks gesien, en was nog nie teleurgesteld nie. Rachel speel ook heerlik in die fliekie, en Bang Bang vat die koek! Dit is ligte kunsfliek vermaak, en beslis aan te beveel vir Vrydagaand moegheid..... Wat opval is die hoeveelheid styl wat die twee hoofkroeks aan die dag le^. Saam met Bella op die bank.

Night at the Museum: Battle of the Smithsonian - 6/10

Hierdie opvolg is regtig die moeite werd, en die kinders sal dit saam geniet, veral vroee" laerskool laaities.

Sunshine Cleaning - 6/10

Ons het toevallig twee films op dieselfde aand met Amy Adams in gekyk. In beide was sy uitsonderlik, alhoewel sy nog nie 'n gunsteling aktrise is nie. In Night at the Museum: Battle of the Smithsonian is sy regtig goed as Amelia Earhart. In hierdie fliek speel sy weer 'n taai koekie, maar die keer met 'n heeltemal ander gemoedstemming. Sunshine is dalk hier en daar so bietjie stadig, maar steeds 'n goeie opsie. Dit is die probeerslae van die mense wat mens maar raak in die film, en dan ook die mislukkings. Dit is dalk so klein bietjie sentimenteel, maar seker dan toepaslik. Alan Arkin bly ook 'n redelike goeie akteur. Hy verleen aanvanklik 'n stabiliserende rol, wat dan skielik ook in vrot vis verander, en dan weer terugskakel (die klein stukkie sentiment). Wat dalk so bietjie onrealisties is, is die manier wat die mense deur al die dinges vasbyt en aanbeur.... Goeie film, dalk nie heeltemal kuns nie, maar ook nie net mainstream nie. Saam met Bella op die bank.

Die Fälscher (The Counterfeiters) - 7/10

Die Fälscher is 'n baie goeie oorlog film, met 'n ander tipe storie as wat mens gewoonlik sou verwag. Die hoofkarakter het net eenvoudig 'n gesig wat mens laat dink aan slegte tronke, erge skelms, en baie swaarkry. Die grimmigheid van oorlog is darem in 'n verwerkbare vorm aangebied, maar tog steeds ontstellend. Dit help dat mens dit as 'n terugflits kyk, dit maak die verwagtings so bietjie meer gedemp (dat iemand nou nie halfpad in die fliek sal doodgaan nie). Dit wys ook dat nie alle Duitsers dieselfde wou doen aan die Jode nie. Saam met Bella op die bank.

Dragonball Evolution - 4/10

Hierdie gee heeltemal weg dat ek te oud raak vir hierdie tipe flieks. Dragonball Evolution is net nie my koppie koffie nie. Die spesiale effekte is nie snaaks nie, en die storie maar dun. Op rekenaar terwyl ek in Arniston was vir werk.

Jersey Girl - 4/10

Jawel, 'n ietwat voorspelbare fliekie, met nie te veel om die lyf nie. Dit tel seker as 'n tjiekfliek. Dit is erg Hollywoods, sentimenteel en resepie gedrewe. Aan te beveel vir 'n breinlose Vrydagaand op DVD. Op rekenaar terwyl ek in Waenhuiskrans was vir werk.

Angels and Demons - 6/10

Hierdie opvolg op The Da Vinci Code is vir my effens beter as die voorganger. Op die ou einde is dit maar net 'n ietwat meer intelligente skattejag-tipe fliek met die Katolieke hoofkwartiere as milieu. Daar is nie juis sprake van karakterontikkeling nie, en vir een of ander rede het ek reeds met die heel eerste toneel met ou Ewan in, geweet hy is die opperskurk in die verhaal. Die fliek is 'n lekker Vrydagaand opsie. Saam met Bella op die bank.

Bedtime Stories - 6/10

Hierdie so sowaar 'n baie goeie familie fliekie. Dit is lekker lig om te kyk en mens geniet dit baie saam met die kinders. Dit het ook nie dooie, vervelige stukke nie. Saam met die familie op die bank.

The Great Gatsby - 6/10

The Great Gatsby met 'n redelik enigmatiese Robert Redford (1974) is wel aan te beveel. Ek moet egter erken dat ek die film heelwat meer sou gegee het, as hulle iemand anders as die floskoppie Mia Farrow gebruik het. Iemand wat dalk meer soos Lois Chiles, wat die rol van Jordan vertolk het, is. Ek het die boek gelees, en voel dat hulle met die film dit nie 'n onreg aandoen nie. Gatsby se huis is asemrowend - vir die tydperk - en die partytjies dalk nog losser was wat mens die voorgestel het. Saam met Bella of die bank.

White Coats (Intern Academy) - 4/10

White Coats (Intern Academy) is nie te sleg om te kyk, al gee ek dit 4/10. Dit is hiper ligte vermaak en sal waarskynlik meer geniet word deur mediese studente. Dit is 'n beter Kanadese komedie. Saam met Bella op die Bank.

Changeling - 7/10

Changeling is 'n swaarder drama gebaseer op werklike gebeure. Clint Eastwood as regiseur het 'n redelike sagte benadering, maar ek voel van die tonele, veral waar die jong kinders betrokke is, kon hy nog meer impliseer wat gebeur, en nie noodwendig wys nie. Angelina speel so effens oordrewe, maar is tog goed. Dalk nie Oscar materiaal nie. Sy trek egter vreeslik mooi aan in die fliek. Die tydperk is ook baie mooi herhaal in die fliek. Een van my vrese word baie goed in hierdie fliek uitgebeeld - dat mens sonder rede in 'n gestig gegooi word tussen malles en dan regtig mal word.... Nie heeltemal Vrydagaand vermaak nie, maar dit is so goed dat dit nie regtig pla nie. Saam met Bella op DVD.

Race to Witch Mountain - 4/10

Race to Witch Mountain is 'n Disney fliekie met sekerlik die mees irriterende klankbaan ooit. Hulle kon darem wraggies ten minste twee verskillende "backtracks" gebruik en nie net een nie....My 6 en 9 jariges het die fliek baie gelaaik.....Saam met die familie op die bank.

All's Faire in Love - 5/10

All's Faire in Love is 'n baie onbekende fliek met nog meer onbekende karakters, behalwe vir Christina Ricci. Dit is egter heel kykbaar. Die milieu is tot 'n mate verfrissend, maar die storielyn seker nie. Agv die milieu, is die storie, wat reeds lig is, nog meer tong in die kies. Vir 'n naweeksaand as jy regtig in 'n goeie bui is. Saam met Bella op die bank. Groter kinders, meesal dogters sal die fliek baie geniet.

Get Smart's Bruce and Lloyd Out of Control - 4/10

Aag nou ja, mens moes seker verwag dat hierdie twee 'n splinterfliekie sou maak. Moet se^ dat die Hymie skreeusnaaks is - die akteur wat dit doen is perfek. Net jammer daar is so min van hom in hierdie fliek. Aag wat, lekker Vrydagaandbreinlosevermaak. Dit is mak genoeg vir 9-jarige seuns ook. Saam met die hele familie op die bank.

Chicken Run - 6/10

Chicken Run is puik, veral as mens dink dit is grotendeels met klei gedoen. Dit is seker nou die derde keer wat ek dit sien, maar het nog net nooit 'n resensensie daaroor geskryf nie. Dit is goeie familie vermaak. Saam met die hele familie, insluitend Pa Harm en Ma Lenie, in Bloemfontein op hulle DSTV.

X-Men Origins: Wolverine - 8/10

X-Men Origins: Wolverine is baie goed vir die genre - dit het 'n kompleks genoeg storielyn, die karakters is baie geloofwaardig, en die aksie is nie te bloederig nie. Die spesiale effekte is ook nie steurend nie. Ek is nie 'n vreeslike Hugh Jackman aanhanger nie, veral nie na Australia nie, maar in hierdie fliek pas hy baie goed. Dit is die meer denkende superheld fliek, soos byvoorbeel die Hulk met Eric Bana. Dit is ook heelwat beter as die eerste twee uitgawes. Dit werk op DVD. Saam met Bella op die bank.

The Day the Earth Stood Still - 3/10

Aag nee wat, dit is seker die slegste fliek wat een van my gunsteling aktrises nog gemaak het... Die storie is flou, die effekte is flou, alles is flou. Vermy maar eerder. Ek het boonop gedink die fliek handel oor die titel en nie verbeeldinglose, vervelige buitenruimse wesens nie.... Saam met Bella op die bank.

Phoebe in Wonderland - 7/10

Phoebe in Wonderland is nogals 'n moeilike een om iets oor te skryf. Aanvanklik lyk die familie so bietjie disfunksioneel, maar dan besef mens tog later dit is nie so nie. Die fliek is uiters goed gemaak, met briljante vertolkings van omtrent al die akteurs, insluitend al die kinders. Dit is egter Phoebe en die Koningin van Harte wat uitstaan bo die res. Ek sou reken die Oscar beoordeelaars gaan 'n moeilike tyd he^ om beste ondersteunende rol te bepaal...Ek moet se^ dat die kinderakteurs uiters moeilike rolle met skynbare gemak vertolk. Die fliek is dalk ietwat bokant my emosionele intelligensie, maar dit bly egter 'n goeie fliek om te kyk. Dit is beslis die moeite werd om te kyk, veral vir iemand wat van so bietjie meer om die lyf hou. Verskeie temas word ook aangespreek, waarvan eksistensialisme, kinders-grootmaak en Touret se Sindroom beslis drie is. Saam met Bella op die bank.

Zack and Miri Make a Porno - 4/10

Hmmm, ja, ek dink Seth Rogen begin te veel soos Jack Black word - hy is soms snaaks, maar net te irriterend in sy poging om die Hollywood-idee van 'n held te probeer omverwerp. Zack and Miri Make a Porno probeer 'n alternatiewe tjiekfkliek te wees, maar slaag nie regtig nie - die liefdesverhaaltjie is daar, alhoewel dunnerig, en met soveel kru taal dat dit maar nie lekker is om te kyk nie. Die seks en naaktonele is te min en onopvallend dat dit sal pla. Selfs die titel se blaf is baie erger as sy byt. Dit is net die baie vloek wat naderhand nie meer snaaks is nie. Mens kan so fliek baie meer stylvol maak, en steeds anders wees. Saam met Bella op die bank. Vermy maar eerder.

Shark Tale - 5/10

Redelike kykbare fliekie met baie gewilde akteurs se stemme. Shark Tale is darem 'n kinderfliek met 'n boonste lagie vir die grootmense...Saam met die familie op die bank. Dit is ook 'n DVD wat die kinders besit. Moet se^ dat De Niro nogals goed is, en dat die hy so wraggies nes hy lyk!

Flash of Genius - 5/10

'n Heel aanvaarbare film oor Dr Kearns, die uitvinder van die "intermittent wiper" aksie. Hy het hom vrek gesukkel om erken te word. Greg Kinnear is nie te sleg as 'n regte ingenieur nie, en speel heel geloofwaardig. Hierdie is 'n redelike Sondagaand fliekie, wat maar redelik gou vergete sal wees. Saam met Bella op die bank.

Watchmen - 8/10

Watchmen is visueel een van die bestes wat ek nog gesien het - die tonele spring as't ware uit die skerm uit. Die storielyn is kompleks genoeg, en die karakters geloofwaardig in hul rolle. Hierdie is egter nie jou standaard superheld film nie, en moet ook nie verwag dat hulle sonder foute is nie. Dit volg ook nie die gewone humor pad nie, alhoewel daar genoeg dialoog is wat mens seker as humor kan beskou. Daar word ook seker 'n paar eksistensiele temas aangespreek, veral na die einde waar die blouman, oftewel Dr Manhatten, 'n opoffering maak ten einde die mensdom teen homself te red. Hy het dit egter nie vrywillig gedoen van die begin af nie, maar is eerder daarin in-getruuk. Aan te beveel vir die ou wat so bietjie meer as spiere van sy superhelde verwag, en wat soos Hancock maar 'n paar slegte geraamtes in die kas het. Die fliek sal die meer onderskeidende teaterganger beloon met sterk visuele vertoon, 'n goeie storielyn en 'n paar taai temas om aan te herkou. So terloops, hierdie gaan nie lekker op 'n klein skermpie werk nie. Saam met Bella op die bank.