L'odyssée (The Odyssey) - 7/10

L'odyssée (The Odyssey) werk goed omdat dit in die brontaal verfilm is. Interessante geskiedenis wat bevestig sommige afgode het voete van klei. Al was Jacques Cousteau se intensies nie altyd so edel nie, het hy steeds baie vermag en bewusmaking van ons planeet se fyn balans behaal. Saam met Bella op die Bank. 

Arctic - 7/10

Arctic bevestig die menslike gees en wil tot oorlewing, en dan ook seker dat nie almal so sterk soos die hoof karakter sou staan nie. Die film voel hiper realisties, soveel so dat mens bibber en beef na dit, en opsluit in jou warm nes gaan kruip. Minimalisties in alle opsigte, behalwe impak. Saam met Bella op die Bank.

A Midsummer Night's Dream - 5/10

A Midsummer Night's Dream is dalk net te volksvreemd. Het nie vir dit kans gesien nie. Sowat 15 minute uitgehou. Saam met Bella op die Bank. 

Mr. Jones - 8/10

Mr. Jones is 'n kragtige uitbeelding van verskeie donker menslike gedragte, veral hoogmoed. Sterk vertolkings, akkurate periode en milieu. Die gru van oorlog en gulsigheid laat mens verslae, so-ook die ontberings wat mense moet ly agv onvanpaste leiers. Dit is dan ook tragies, en meer so omdat dit op ware persone gebaseer is. Beslis as jy lus voel vir 'n kunsfilm met 'n sterk onderbou. Maar wees gewaarsku, nie vir algemene gehore bedoel nie. Saam met Bella op die Bank.

The Limits of Control - 4/10

The Limits of Control is my limiet, dit lyk net te veel na 'n film sonder enige sinvolle dialoog. Uiters minimalisties en repeterend vir effek. Sowat 20 minute later die limiet geslaan. Saam met Bella op die Bank.

The Invisible Man - 4/10

Gits, nee, The Invisible Man werk net nie. Nie lus vir hierdie sinnelose verhaal lyn nie. Redelik vinnig moed opgegee. Saam met Bella op die Bank.

Space Force, Reeks - 6/10

Space Force ... Lekker Vrydagaand eet-voor-die-teevee materiaal. Saam met Bella en Anrich op die Bank.

Belgravia, Minieeks - 6/10

Belgravia is nou wel nie Downton Abbey nie maar is tog 'n redelike periode drama vol intriges. Dit het wel 'n stouter lyn as Mnr Carson en sy spannetjie, met 'n sappige einde. Saam met Bella op die Bank.

Marie Curie: The Courage of Knowledge - 6/10

Marie Curie: The Courage of Knowledge is beter as die ander poging omdat dit meer getrou aan die verskeie tale is. Haar lewe bly merkwaardig - sy gee amper alles op vir haar wetenskap. Beslis die moeite werd, al is dit net vir die periode, Saam met Bella op die Bank.

The Emperor of Paris - 7/10

The Emperor of Paris is 'n lekker sappige Franse kunsfilm gebaseer op ware karakters en gebeure. Dit bevat al die nodige elemente met beter as gemiddelde dosisse. Saam met Bella op die Bank.

The Islands - 4/10

The Islands lyk baie belowend met 'n interessante onderbou gebaseer op ware gebeure. Alhoewel die produksie propers lyk, is die vertolkings en dialoog oninteressant en amateuragtig. Dis jammer, hierdie het potensiaal. Sowat 15 minute lank probeer en die aftog geblaas. Saam met Bella op die Bank. 

A Boy Called Sailboat - 7/10

A Boy Called Sailboat is een van daardie onontdekte juweeltjies. Dit is prettig maar tog ook tragies, en met allerhande vreemde gewoontetjies. Dit is verfrissend anders met 'n karakter en milieu ekonomie wat jou sal bybly vir sy eenvoud maar onverdunde impak. Saam met Bella op Bank

3 Days with Dad - 4/10

3 Days with Dad probeer te veel intrige uitvind en bo-op vasplak dat mens nie vashou daarop kan kry nie. So 20 minute later moes ons tou ingooi. Saam met Bella op die Bank.

Bad Education - 6/10

Bad Education lyk na 'n ordentelike drama, maar net waarvoor ek nie nou lus is nie. Sterk rolverdeling en vertolkings, maar het dit nie klaar gekyk nie. Saam met Bella op die Bank.

Capone - 5/10

Ek was erg teleurgesteld toe ek besef Capone handel oor die einde van sy lewe eerder as al sy rampokkery. Niemand stel in die einde belang nie, eerder die luisteryke, opwindende deel. Het die aftog geblaas na sowat 20 minute. Dit is egter 'n kragspel vir die hoofrol, maar die kool is nie die sous werd nie. Saam met Bella op die Bank.

Torpedo - 5/10

Dit is te duidelik dat Torpedo 'n lae-koste  produksie is met net te amateuragtige dialoog en vertolkings. Het sowat 15 minute kon uithou. Saam met Bella op die Bank. 

Devs, Minireeks - 7/10

Devs is hipnotiserend, veral die klankbaan. Dit is modern, ekonomies, visueel, en stadig. Moet nie vinnige aksie verwag nie, eerder stadige, swanger tonele. Mens wil sien wat gaan gebeur. Saam met Bella op die Bank.

Penny Dreadful: City of Angels - 5/10

Dis nie dat Penny Dreadful: City of Angels so sleg is nie, dit is 'n redelike gehalte produksie, met sterk vertolkings en interessante milieu. Dit is net dat mens nie vir die hoofkarakters omgee nie, en ook nie vir die raaiselagtige moorde nie. Sal eers verby hou met hierdie een. Saam met Bella op die Bank.   

The King - 7/10

The King is 'n sterk drama met gebeure en karakters eerder volgens Henry V as geskiedenis. Dit is stylvol, sterk vertolkings met die nodige dramatiese effek soos bedoel deur Shakespeare. Beslis vir die connoisseur bedoel. Hier en daar Frans (sonder opskrifte). Saam met Bella op die Bank.

Proximity - 4/10

Proximity is laekoste film of sy beste - die lyn hou mens se aandag, maar daar is 'n paar tonele wat beslis die amateur aanslag sterk laat deurslaan. Tog kykbaar. Saam met Bella op die Bank.

Addams Family Values - 6/10

Het Addams Family Values baie lank terug gesien, maar weer Saam met Bella en Anrich gekyk. Selfs Franko het 'n paar kort stukkies gekyk. Selfde as die voorganger, met humor en tonele wat die moderne oe" sal laat rek...

Return of the Hero (Le retour du héros) - 5/10

Return of the Hero (Le retour du héros) is 'n baie ligte Franse drama met die mees romantiese klein dorpie. Van die vertolkings is dalk ietwat oordadig, maar daar is heelwat humoristiese oomblikke. Die humor pas goed by die tydperk. Saam met Bella op die Bank.

 

The Addams Family - 6/10

The Addams Family bly tydloos snaaks, na soveel jare. Het dit wel gesien, maar die slag saam met Bella en Anrich, op die Bank. Wat wel pla, is ek onthou hulle van met net een 'd', is dit 'n Mandela effek? Sal wel die opvolg ook met Anrich kyk. 

 

The Song of Names - 7/10

The Song of Names is 'n stadige drama, redelik gevoelvol, met 'n soet maar hartseer verhaal. Sterk vertolkings en 'n raak milieu en periode. Saam met Bella op die Bank.

Radioactive - 4/10

Radioactive laat mens in war, aan die een kant is dit goed en aan die ander kant baie swak. Die film ambiance pas nie by die tema nie. Dit voel ook in sekere opsigte oordoen, selfs oordadig. Sal dalk beter werk as 'n minireeks. Saam met Bella op die Bank. 

Mulan: Rise of a Warrior - 7/10

Mulan: Rise of a Warrior is in Sjinees met onderskrifte, Dit kyk waarskynlik beter as 'n Hollywood oordrewe interpretasie. Moet nie die beste grafika en toertjies verwag nie, dit voel amper amateur teen die Hollywood masjien, maar is eerlik, sielvol en gepas. Saam met Bella op die Bank.

The Night Clerk - 4/10

The Night Clerk is 'n lae koste kunsfliek met 'n taamlik vreemde tema. Ek is nie seker wat mens sou beweeg om hierdie film te maak nie. Dit is eintlik dan 'n vermenging van genres wat nie heeltemal sin maak nie. Mens begin die film kyk en hoop dan vir 'n verassende einde, en besef te laat die tyd bele^ daarin betaal nie met dividende nie. Die hoofrol vertoking is sterk, maar die hele fliek kort daai iets. Saam met Bella op die Bank.

La Belle Époque - 7/10

La Belle Époque is 'n ligte Franse hoofstukkie uit 'n liefdesverhaal. Dit is soet, stout en mooi om na te kyk. Die vertolkings is gepas, en die dialoog vinnig, so mens moet lees aan die onderskrifte dat dit bars. Moderniteit in verlore eras word kreatief herskep as ontvlugtings milieus vir die karakters met ander wat van bo toekyk en elemente in die milieu bestuur, amper soos 'n poppespel met regte mense op volskaal. Saam met Bella op die Bank.

Trading Paint - 4/10

Ten spyte van die rolverdeling, is Trading Paint baie voorspelbaar, 'n uitmundende voorbeeld van film cliche's en net te sentimenteel. Is tog redelike Vrydagaand as jy pap is kykmateriaal. 'n Outomobiel tjiek se fliek. Saam met Bella op die Bank.

Hunters, Seisoen 1 - 1/10

Na so vinnige skip kyk deur die eerste episode van Hunters het ons besluit om dit eerder te los. 

Misbehaviour - 7/10

Misbehaviour is met net genoeg sensasie en drama gemaak, enigsins meer en dit sou onkykbaar wees. Ten spyte van als wat mens weet rondom die aktuale sake van die dag wat uitgebeeld word, leer mens tog nog 'n ding of twee by. Saam met Bella op die Bank.

Finding Steve McQueen - 6/10

Finding Steve McQueen is 'n soete, stil, periode bankroof fliekie, gebaseer op ware gebeure. Dit is aangenaam om te kyk met speelse vertolkings wat andersins baie vervelig sou wees. Saam met Bella op die Bank.

Love. Wedding. Repeat - 6/10

Love. Wedding. Repeat is 'n taamlik gemiddelde tjiekfliekie, darem ten minste met 'n paar lag-snaakse tonele, veral die eerste slaap ene. En so een lus vir die oog aktrise. En natuurlik die Italiaanse villa en klein dorpie. Ai. Saam met Bella op die Bank.

The World's Fastest Indian - 6/10

The World's Fastest Indian is ligte kykmateriaal, ongekompliseerd en met 'n eenvoudige lyn. Beter as gemiddeld, en laat mens deel voel van die uiteindelike poging. Saam met Bella en Anrich op die Bank.

Bodyguard, Seisoen 1 - 6/10

Bodyguard lyk glad nie te sleg nie, dalk 'n bietjie te ernstig, soos die manlike hoofrol vertolking. Maar Brits en onderspeeld. Saam met Bella op die Bank.

The Spanish Princess, Minireeks - 6/10

Gits, The Spanish Princess is 'n sterk jong dame. Sy vatikaki. Interessante deel van die Britse geskiedenis. Kon seker doen met meer oortuigende vertolkings hier en daar, maar steeds heel gangbare kyk materiaal. Saam met Bella op die Bank.

Military Wives - 5/10

Military Wives is 'n voelgoed fliekie, baie lig en eenvoudig. Tog hou dit mens se aandag al is dit oorwegend tjiekfliek materiaal. Wel op ware gebeure gebaseer. Saam met Bella op die Bank.

Cats - 4/10

Cats het ongelooflike menslike beweegkunde. Maar die lyn en die gevoel is vreemd en mens kan dit net solank uitstaan. Ook half vervelig. Ons het die eerste en laaste stukke gekyk. Die dialoog en musiek is net te flou. Saam met Bella op die bank.

Bloodshot - x/10

Het die eerste 20 minute van Bloodshot begin kyk, maar sal dit dalk alleen klaar kyk, nie Bella se koppie tee nie.

The Pale Horse, Minireeks - 6/10

The Pale Horse is 'n rustige misterie met 'n stylvolle en getroue Britse milieu. Ou geld. En baie. Net twee episodes met uitbakening vir meeste van die eerste episode. Saam met Bella op die Bank.

Coda - 6/10

Coda is 'n baie stadige, innerlike wereld kunsfilm wat baie van die kyker verwag. Die klankbaan is wel uitstaande met sterk klavierstukke. Dit lyk nie of die film op ware gebeure gebaseer is nie, maar wel aan iemand opgedra is. Dit gaan my ietwat te bowe waarom mens dan so film sou wou maak - dit is 'n swaar en moeike tema. Nie vir beginner kunskring aanhangers nie. Saam met Bella op die Bank.

The Gentlemen - 8/10

The Gentlemen is beslis die nuwe standaard vir rampokker films. Skerp dialoog, fyn kostuumwerk, konkellary met die spanningslyn, en 'n vertelstyl en trant wat mens vasgenael hou. Stylvolle gevoel, maar wees gewaarsky swaar en baie vloek, gepas vir die tipe rampokkers wat uitgebeeld word. Saam met Bella op die bank. Eerste dag van die nasionale inperkingstydperk ("lockdown") agv COVID-19. Later genoem die grendelstaat. 

21 Bridges - 3/10

21 Bridges is 'n flou prosedurale cliche.  Dit is so goed Bella het selfs deur dit geslaap. Onwaarskynlike sameloop van voorspelbare gebeure. Saam met Bella by Marakele, ons laaste aand daar saam met Anrich.

Birds of Prey: And the Fantabulous Emancipation of One Harley Quinn - 6/10

Birds of Prey: And the Fantabulous Emancipation of One Harley Quinn is heel kykbaar, maar verg deursettingsvermoe" as hierdie nie heeltemal jou idee van 'n superheld film is nie. Sy is eerder die anti-held tipe. Dalk die skurk selfs. Aweregse humor gemeng met 'n ekstreme popkultuur element. Saam met Bella by Marakele.

Judy & Punch - 7/10

Judy & Punch het sulke ontstellende poppies wat nogal aan ou Chuckie herinner. Die film het 'n fantasie gevoel, maar beslis nie romanties of sprokie nie. Moeilik om te klassifiseer of te resenseer. Nie vir alle smake bedoel nie, maar steeds 'n opsie vir 'n Vrydag of Saterdagaand. Dalk 'n connoisseur fantasie? Saam met Bella by Marakele.

1917 - 8/10

Soos meeste oorlogflieks, bevestig 1917 net weereens die sinnelose, wrede geweld en magteloosheid daarvan. Hierdie is 'n werklike, realistiese, onstellende, grim, maar akkurate weerspieeling, en beslis 'n moet as jy van geskiedkundige of oorlog films hou. Saam met Bella op die Bank.

Closer to the Moon - 8/10

Closer to the Moon is aanvanklik lig, amper humoristies, maar raak al nader na die einde tragies en net plein hartseer. Hier vra mens eintlik vir die maanskyn en rose einde. Die milieu, vertolkings en periode is romanties, maar met skerp kantjies wat deursteek. Saam met Bella op die Bank.

Breakable You - 6/10

Breakable You is 'n na-aap Woody Allen, maar glad nie te sleg nie. 'n Praat-ryke fliekie met 'n tone krul ontknoping. Saam met Bella op die Bank.

The Story of Racheltjie De Beer - 8/10

Na al die jare, nadat mens die verhaal op skool geleer het, en selfs lateraan gedink het Racheltjie het eintlik met haar minnaar weggeloop, kom hierdie interpretasie aan die lig wat soveel meer sin maak. Professioneel vervaardig, gepaste vertolkings, gepaste kostuums en 'n raak milieu met 'n sterk spanningslyn maak hierdie trotse kunskring materiaal. Saam met Bella in die Neelsie se Pulp Cinema by die Woordfees. 

Tjuras4Lyf (kort film) - 6/10

Vat Tjuras4Lyf met 'n knippie sout, maar dan besef mens ook die eerlikheid van hiedie kort film (27 minute). Alhoewel amateuragtig vervaardig, met amateur vertolkings en alledaagse, amateur stelinkleding maak hiedie geensins swak materiaal nie. Dalk nie stylvol en preuts nie, maar beslis met 'n sterk boodskap. Wat mens nogals laat lag (ongemaklik giggel?) ook. Die WNNR verskyn dan ook baie onverwags in die film, wat mens laat wonder oor die waarskynlik dat so iets gebeur as daar net 4 of 5 mense in die teater sit, waarvan moi by die WNNR werk.... Saam met Bella in Neelsie se Pulp Cinema - wat 'n retro ervaring! - as deel van ons dirty weekend by die Stellenbosch Woordfees.