Hotel for Dogs - 5/10

Hotel for Dogs is maar 'n doodgewone kinderfliekie, met nie eintlik 'n boodskap vir die ouers nie. Dit het ook nie 'n gelaagde dialoog poging nie. Die kinders geniet dit egter baie.

Wag the Dog - 6/10

Wag the Dog is 'n ouer fliek wat ons video winkel besluit het om nou eers aan te koop. Dit is redelik tydloos (1997) en voel nog steeds vars. De Niro en Hoffman bly maar goeie akteurs. Die film is lekker kykbaar, en goeie medisyne vir 'n Sondagaand. Saam met Bella op die bank. Dit is beslis nie net gemiddelde vermaak nie.

The Spirit - 6/10

Na Sin City, is ek 'n redelike Frank Miller aanhanger. The Spirit stel nie teleur nie. Dit is heelwat ligter as Sin City, wat nogals donker en heelwat meer geweldadig is. Die dialoog in Spirit is baie goed, en veral ou Scarlett, as Silken Floss, speel iets anders as die seksie meisie, alhoewel sy nogals oulik lyk in die rol ook. Sy bly maar 'n gunsteling. Moet se^ die storieverteller kan by tye so ietwat irriterend wees, en die tweede helfte van die film is beter as die eerste deel. Die klone ("we was..") is uitstekend en nogals snaaks met tye. Saam met Bella op die bank. Vir meer avontuurlistige fliekgangers bedoel, wat iets anders as Tarantino soek vir pulp alternatiewe... Kyk ook gerus die onderhoud met Miller in die ekstra dele - baie interessant...

The Transporter II - 5/10

Wel ons het van nommer I en III gehou, met I vir my beter as III. Ek hoop dus II stel nie teleur nie...Dit het ook toe nie. Is regtig kykbare aksie, met koel truuks. Lekker Vrydagaand medisyne. Saam met Bella op die bank. Ons ete saam met die Van Pletzens is gekanselleer agv Anrich se ongeval met die deur by Chamberlains.

Perfect 10 - 3/10

Perfect 10 kry ek glad nerens opgespoor op 'n site nie. Dit was op etv tydens my besoek aan die EO Kamp by Polokwane (Pietersburg) laasweek. Dit is nie heeltemal onkykbaar nie, maar het een of ander bleeksiel as hoofkarakter wat dink die son skyn uit sy alie. Dit is egter dalk beter om hierdie op die ou einde te ignoreer.

The Wrestler - 8/10

Veral na Sin City, kyk ek met ander oe" na Mnr Rourke....The Wrestler is 'n moeilike film om te kyk, maar uitstekend. Die karakterontwikkeling is so goed as wat mens dit kan kry, en Randy is so geloofwaardig dat mens dit nie anders kan voorstel nie. Die fliek spreek uiteindelik verskeie diep temas aan, maar veral eksistensialisme. Randy se^ ook dan op 'n stadium in die fliek: Dit is veiliger vir hom in die arena, wat maar erg lyk, as die lewe buite die arena - daar kry mens op ander vlakke seer, eerder as fisies. Randy bestuur sy beserings soos hy al jare doen, maar weet nie regtig hoe om emosies te bestuur nie. Die fliek is regte arthouse, en glad nie toeganklik vir die ou wat breinlose vermaak soek nie. Stoei fanatici mag dit dalk toeganklik vind, maar sal dan waarskynlik eerder na die tegniese aspekte van stoei kyk. Hierdie is beslis nie ligte vermaak nie. Marissa Tomei speel dan ook 'n verassende rol, die een van 'n ontkleedanser. Soos in Before the devil knows you're dead, is sy glad nie skaam om van haar kleertjies ontslae te raak en meer as net lyf te wys nie. Vir 'n girl van 45 het sy 'n lyf wat baie twintigjariges sal laat skaamkry. Ek het die fliek nouwel nie ontspannend gevind nie, en ook nie die regte ding vir 'n Vrydagaand nie, maar dit steeds geniet omdat dit so goed is. Saam met Bella op die bank.

The Hangover - 7/10

The Hangover is sekerlik die beste in die genre van ramparty flieks wat ek nog gesien het. Die film het 'n baie interessante storielyn, en die karakters word met oortuiging vertolk, alhoewel met die nodige skep van oordrewenheid. Die arme manne bevind hulle self in pynlike situasies na die party. Dit is beslis snaaks, en daar is vele situasies, nie net 'n paar floues nie. Hulle vloek redelik baie in fliek. In Polokwane (Savannah mall) in die teater, tydens 'n veldoefening van die werk. Weereens alleen. Daar is ook redelik van die situasies wat mens lank na die tyd bybly, en opnuut voor laat lag. Kyk gerus, veral as jy 'n ramparty beplan of gaan bywoon...

G.I. Joe: The Rise of Cobra - 6/10

Die slagspreuk op G.I. Joe: The Rise of Cobra se plakaat is: Evil never looked so good, en is hulle reg...Sjoe, die twee hoofaktrises doen dit gestand. Die fliek is beslis nie 'n Gadget Bond nie, maar het baie meer koel apparaatjies en truuks as die laaste drie Bond films saam. Dit is baie vinnige kop-dronk aksie, en heel kykbaar, maar beslis net in die teater - dit sal effek verloor, selfs op 'n 40" skerm. Ek het dit geniet, dit hou mens meesal op die punt van jou stoel. Het hierdie in Polokwane se Savannah mall gesien tydens die EO Kamp wat ek bygewoon het. Ongelukkig alleen. Sienna was nogals heel koel in die fliek, alhoewel dan een van die Evil girls...

Balls Out: Gary the Tennis Coach - 3/10

Balls Out: Gary the Tennis Coach was maar ietwat teleurstellend - veral na The Interview. Dit was maar heelwat onder die belt, maar darem snaaks hier en daar. Ek dink dit was net te oordrewe om sin te maak as 'n alternatiewe kunsfliek. Daar is baie pynlik ongemaklike tonele, wat mens so kriewel gee. Dit probeer dan ook te veel genres aan te spreek - inspirasie, komedie, slap-stick, ...., te veel om die fliek regtig rigting te gee. Saam met Bella op die bank. Nie regtig aan te bevele nie.

Jesse Stone - 5/10

So wraggies waar! Magnum speel nog in flieks! Hierdie lyk soos een van daardie reeks flieks. Ou M speel 'n hardebaard polisieman, wat regtig niks k*k van niemand vat nie, en dinge doen soos sy hy dink hy moet. Dis een van daai flieks waar mens dink, ek sou hier so of sus gemaak het, en dan doen hy dit - die voor die hand liggendes, wat die res van die flieks gewoonlik nie doen nie, want dit sal nie verkoop nie....Heel kykbaar. Hierdie ook saam met Bella op die bed op Kiara Lodge, Clarens, se DSTV.

Fool's Gold - 5/10

Wel, nog 'n fliek waarin die meeste dames floutes kry by die aansig van ou Matt se borskas. Die storie is darem beter as die meeste van hierdie tipe flieks en heel kykbaar. Dit is egter maar heel voorspelbaar op die ou einde. Saam met Bella op die bank, of eerder die bed....hierdie slag op Kiara Lodge se DSTV kanaal, naby Clarens, lekker laat in die aand. Net jammer dit was 'n baie klein skermpie.

Hors de prix (Priceless) - 6/10

Ek het Priceless baie geniet. Dit is seker 'n gemiddelde Franse film, maar die feit dat hulle dit Frans gehou het, met onderskrifte, lig dit vir my daardie aks uit. Ek is 'n groot aanhanger van Audrey Tatou, veral na aanleiding van Le fabuleux destin d'Amélie Poulain (Amelie). Hierdie een is nie so goed soos Amelie nie, maar vertel tog die bittersoet liefdesverhaal van 'n dood gewone ou. Die fliek het 'n paar pynlik-ongemaklike stituasies, alles deel van die komiese inslag. Aan te beveel as ligte vermaak vir die ietwat meer onderskeidende fliekganger. Saam met Bella op die bank.

Boetie gaan border toe - 5/10

Jawel, hierdie is ook die tweede keer dat ek Boetie gaan border toe sien. Die eerste slag was in die Astra teater op Pietersburg destyds in 1984. Ek was in 'n rype Standerd IV.... Ek moet se^ dat ek die fliek destyds baie geniet het, en vermoed ook dat daar 'n stuk aan die einde afgesny is met die oorsit op DVD. Ou Janie du Plessis is steeds vir my 'n mooi girl, met spiky hare en al. Die storielyn val egter so bietjie rond, en mens voel ietwat verward in van die tonele. Maar dan is dit ook seker hoe dit in die Army was destyds. Mens moet hierdie maar weer 'n slag sien, want dit lewer op die ou einde baie skerp kommentaar. Saam met Bella op die bank.

Role Models - 6/10

Wel, die ou van Role Models het baie goed gedoen in The Promotion, so toe probeer ons maar hierdie een wat op die oog af redelik gemiddeld lyk. Vrek, die fliek val buite die genres wat ek ken! Dit is inspirerend, jackass-agtig, Hollywoods, komedie,... wat nog !? Dit is beslis vermaaklik, maar dalk 'n bietjie vreemd vir die gewone, gemaklike fliekganger. Seann is beslis 'n goeie akteur want hy pas met gemak in ietwat ernstiger rolle in, en dan soos hierdie. Daar is 'n paar vrek snaakse tonele, en hierdie een van daai flieks wat jou gaan bybly - of dit nou op 'n goeie of slegte manier is, is 'n ope vraag. Aan te bevele, maar met ietwat van 'n huiwering. Saam met Bella op die bank. O, en die verduidelik oor hoekom die meeste mans so behep is met die borste van vroue is seker nie te ver van die waarheid nie - daar is 'n oormag!

Transporter - 5/10

Transporter III was heel aanvaarbaar, so nou probeer ons maar die eerste twee. Nommer een is vir my effens beter as III, met 'n bietjie meer storie. Die aanslag van Luc Besson is duidelik in hierdie films, maar ek moet se^ die aksie tonele lyk net te gestileers en gekorigrafeerd - veral die skop en slaan tonele. Dit is waar III beter vaar. Goeie Vrydagaand vermaak. Saam met Bella op die bank.

The Shaggy Dog - 6/10

The Shaggy Dog het ek al voorheen gesien saam met my twee laaities, maar kan om die dood nie onthou wanneer nie. Dit was wel op DVD op die bank onthou ek vaagweg. Die storie kan ek redelik goed onthou. Ek moet se dat daar 'n paar regtige snaakse tonele is, en beide Tim the Tooltime Man, oftewel, Buzz Lightyear, en Ironman, oftewel Robert, pas goed in hul rolle. Die tong-uithang toneel is baie snaaks, en beide die laaities en Isabel het dit baie geniet. Goeie familie vermaak, bo-gemiddeld, sou ek reken. Saam met die hele familie op die bank die slag.

Invincible - 5/10

Invincible is maar 'n redelike standaard inspirasie-tipe feel-goodie fliekie. Dit is darem gebaseer op 'n ware verhaal met uittreksels aan die einde van die werklike mense. Ek is nie juis 'n sport-kyker nie, en ook nie 'n Amerikaanse Rugby aanhanger nie. Die sport kry egter so amper sy eie karakter in die fliek. Die karakter ontwikkeling is nie te sterk nie, maar hulle probeer darem so bietjie. Dit is 'n Disney fliek, so dit is heeltemal mak genoeg vir die familie. Saam met Bella op die bank.

Astérix aux jeux olympiques (Asterix at the Olympic Games) - 7/10

Eenvoudig die beste slapstick wat ek nog gesien het, verskuil, as 'n groot bonus, in 'n Asterix en Obelix! Gerard is puik as ou Obelix - ek sal nooit weer 'n film met hom in, kan kyk sonder om aan hom in hierdie rol te dink nie. Die storie word vars aangebied, met goeie humor, fisies en ander, wat dit lekker maklike familie vermaak maak. Prinses Irina is vrek mooi - sy is Italiaans. Dis egter jammer hulle het die fliek nie in Italiaans gehou met onderskrifte nie - ek sou dit dan eerder 8/10 gee. Alain Delon is ook puik as 'n self-behepte, narcistiese, snoeshaan Julius Ceasar, met Brutus 'n onbeholpe as seun. Dit is die perfkete anti-werk-week dosis op 'n Vrydagaand. Saam met die familie op die bank.

Wild Child - 5/10

Wild Child is nie 'n te slegte opsie vir 'n Vrydagaand of so nie. Dit is seker eerder gemik op die laat laerskool mark. Dit is vir my baie dieselfde as 17 Again, en dalk selfs ietwat beter. Saam met Bella op die bank.

The News Movie (aka The Onion Movie) - 3/10

The News Movie is eintlik maar dodelik vervelig, met hier-en-daar 'n snaaks genoeg toneeltjie vir 'n laggie of twee. Redelik breindood, met so bietjie minder respek vir heilige koeie, maar dan ook nie regtig eintlik nie. Saam met Bella op die bank. Beter om dit maar 'n mis te
gee.

Van der Merwe PI - 6/10

Nou ja, hierdie is ook 'n punt wat ek gee gegrond op die eerste keer toe ek die fliek in 1988 gesien het. Dis so SA as wat jy kan kry en Anneline Kriel lyk asof sy uit die 80's ontsnap het. Saam met die familie op die bank die slag. Aag wat, ons het lekker gelag, veral vir die short fuze.

El Laberinto Del Fauno (Pan's Labyrinth) - 8/10

Sjoe, vir 'n Spaanse fliek is hierdie een werklik uitstaande. Dit is 'n volwasse sprokie wat twee werelde so meng dat die bisarre sprokie wereld baie meer vriendelik lyk as die harde, koue werklikheid van oorlog. Dit is dan die Capitano, oftewel die weermag kaptein, wat uitstaan as die monster in die verhaal. Die res van die karakters is mak teen sy koue, gevoelose handelings. Die fliek het 'n paar ernstige onstellende tonele, en dan ook aan die regte wereld kant, nie in die sprokie kant nie...Die sprokie monsters is puik, en mens het nog nie sulke skeppings gesien nie. Die fliek hou mens op die punt van jou stoel deurentyd, en al die akteurs is uitstaande. Die fliek het 'n vars benadering, anders as die gewone pulp wat Hollywood aan mens voorle. Dit is hoogs aan te bevele. Ten spyte van die ontstellende paar tonele, is die fliek aangenaam om te kyk, en mens kan nog lekker baie daaroor dink ook. Saam met Bella op die bank. As jy hierdie wil kyk by die huis maak seker jy skakel die ligte af, het 'n 40 duim of groter skerm, en iets om aan te knaag.

Crossing Over - 8/10

Crossing Over is 'n regte art-house fliekie vir my - dit handel baie realisties oor 'n paar lyne in die regte wereld wat dan op die ou einde tot 'n sameloop kom, maar ook nie tot 'n enkele een nie. Die fliek raak mens tog, veral omdat dit nie net fokus op een demografie nie, maar die wyer spektrum aanspreek. Dit raak ook 'n interessante kwessie aan wanneer die Australiaanse paartjie baie verskillende benaderings gebruik tot hul pogings om groenkaarte te kry. Op die ou einde is dit nie so duidelik watter een van die twee werklik verkeerd gehandel het nie. Die een het egter so paar "lykies" langs die pad gelos, en die ander een nie....Hierdie fliek is ook vir die effens meer gesoute kunsfliek ondersteuner bedoel, maar is toeganklik vir iemand wat daarvan hou om te dink oor flieks. Die rolle wat almal puik gespeel, en Mnr Ford doen baie goed hier. Dit is egter die dogter wat haar alternatiewe kyk op die lewe in die klas probeer voordra wat werklik goed speel. Vir die eerste keer in 'n laaaang ruk wat ek in die teater, en dan ook saam met my groot fliek tjommie, Guillaume, gaan fliek het. Hoogs aan te beveel.

Pushing Tin - 5/10

Elke ou wat te doen het met lugverkeer goeters moet Pushing Tin kyk - dit is nou wel 'n ligte romantiese drama, maar tog interessant. Dit is ook waarskynlik die film wat veroorsaak het dat ou Billy Bob vasgehaak het aan Angelina - sy speel so bietjie van 'n minder stylvolle rolletjie, en verlei vir arme John Cusack. Hy is ietwat praatsiek in die fliek. Die fliek is baie kykbaar, veral vir 'n 2000 oesjaar. Dit is nou nie die best fliek van die jaar gewees nie, en voel seker so klein bietjie beter as die streng gemiddelde punt wat ek gegee het. Kyk gerus as jy lus is vir iets anders as nuwe Hollywood. Saam met Bella op die bank.

The Deal - 5/10

The Deal is 'n interessante fliek oor hoe flieks gemaak word, met ou Bill wat nie te sleg speel nie. Meg speel haar gewone tipe rol, en daar is seker genoeg snaakse tonele om die fliek as ontspanning te beskou vir 'n meer breinlose Vrydagaand. Hier so in die helfte van die fliek raak die res van die storie so ietwat meganisties, presies soos die eerste tipe rolprent wat hulle probeer maak - die storie dwing hom self as't ware tot die volgende logiese stappe - of sal mens se^ logiese Hollywood verloop. Wat egter opval met die film is die pragtige SA! Daar is verskeie plekke wat mens dadelik herken, en die opvallende SA Engelse aksent - Sanglish? - dra by tot, haai, ons-ken-mos-hierdie-plek gevoel. Dit sit 'n ekstra dimensie by die fliek, asof SA nog 'n karakter in die verdeling is. As die New Yorkers kan breg oorlat NY 'n karaketer in flieks is, wat daar afspeel kan ons seker dieselfde doen? Kyk gerys, al is die net vir die SA tonele - dit ondersteun tog dan SA as 'n film stel. Saam met Bella op die bank.

Tornado and the Kalahari Horse Whisperer - 6/10

Tornado is 'n Suid Afrikaanse film, en verskyn ook nie op IMDB nie. Dit is heel kykbaar maar het tog maar so hier en daar bietjie cheesy dialoog. Die storie is glad nie ingewikkeld nie, en het die standaard intrige van gebreek/vind liefde. Die vroulike hoofrol het 'n baie "harde" benadering, iets wat seker met die omgewing saamgaan, maar opmerklik is. Die standaard is ietwat beter as van die ander plaaslike films. Saam met Bella op die bank. Kyk gerus om die plaaslike ouens te ondersteun - hul grootste probleem is maar geld.

Tropic Thunder - 6/10

Na 'n aanbeveling van Arno en Bernardt het ek wel besluit om Tropic Thunder te kyk. Bella het dit vir ons bespreek byVee's Video, en ek is nou baie nuuskierig om te sien of dit werklik so snaaks is....

Ja wel, dis iets heel anders as wat ek verwag het - dit is verfrissend anders, baie snaaks, en daar is beslis geen definisie van heilige koeie volgens Stiller nie. Die feit dat hulle bekende akteurs gebruik het, en so verander het dat mens hul byna nie herken nie is baie interessant. Veral Tom Cruise doen iets wat mens glad nie gedink het hy sal doen nie - baie verassend. Ek moet se^ dat Robert Downey en Tom Cruise uitstaan in hierdie aspek, en selfs ook Jack Black, wat ek glad geen ooghaar voor het nie. Hierdie is nie ligte vermaak nie, alhoewel dit seker so gesien kan word - hulle vloek baie, en daar is so paar baie ongemaklike verwysings na geloof. Die geweld weet mens is plastiek, maar daar is 'n toneel wat hierdie wete so verdraai dat jy self bloed in jou mond proe. Kyk gerus, maar nie vir die met 'n swakkerige konstitusie nie. Saam met Bella op die bank.

The Garden State - 6/10

The Garden State is nog 'n film in die genre van flieks wat handel oor een of ander ou wat 'n groente bestaan volg, en dan een of ander besoek iewers afle^ vir een of ander rede. Ek dink Choke val seker in dieselfde kategorie. Ek moet se^ hierdie een is dalk nie so sleg nie, en styg net-net met 'n haarbreedte uit bo my gemiddelde punt van 5. Die hoofkarakter, Zach, is amper dodelik irriterend met sy maniertjies, en dit is tog jammer dat ek waarskynlik nie hierdie een gaan kan klaar kyk nie. Ek het dit net op die vliegtuig begin kyk, en seker nog so 25mins oorgehad voordat ons op ORT moes land....

The International - 5/10

Wel, ek is 'n redelike aanhanger van hierdie tipe flieks, maar The International was vir my net te volgens die ou reseppie. Soos ek gese^ het met Duplicity is die effe oordrewe spel van Clive nou besig om 'n irritasie te raak. Daar is geen romantiese spanning tussen Clive en Naomi nie. Ook op die vliegtuig tussen Munchen en Jo'burg, oppad terug van Istanbul af. Kyk dit gerus op 'n Vrydagaand, as jy net wil vrot.

Fliek herdenking

Ek dink dit was iewers in hierdie week my en Bella se eerste fliek herdenking - ons eerste fliek saam was Police Academy V doerie tyd in 1988. Eish, dit was lekker dae....

Ons verskil ook effens oor die datum, maar dit was iewers in Junie of Julie.... Sy het nog so groen mini aangehad....

17 Again - 5/10

Ek gaan waarskynlik nie die punt vir 17 Again verander nie, al moet ek nog die laaste 10 minute kyk omdat die vliegtuig moes land. Nie te sleg nie, maar darem net te Hollywoods.

Wel, ek het toe hierdie klaar gekyk, en was eintlik eers in die helfte van die fliek blyk dit toe. Soos ek verwag het, wil ek steeds nie die punt verander nie. Die fliek is nie te onaardig nie, heel kykbaar, maat net te voorspelbaar.

He's Just Not That Into You - 6/10

Sjoe, hierdie fliekie het drie van my gunsteling aktrises in.....JA met haar mooi lyf, SJ met haar lippe en flexibility soos Mannie sal reken, en dan JC met haar mooi gesiggie......Net jammer omdat die drie dalk so effens meeding vir kamera-aandag speel hulle nie een werklik goed nie. Mens kry half die idee hulle het 'n fliek probeer maak met al die hot akteurs/aktrises in, en vergeet van die storie....Mens geniet en identifiseer steeds met dit egter, omdat heelwat relevante aspekte aangeraak word op 'n redelike omsigtige manier. Hierdie een ook op die vliegtuig gesien soos met Duplicity. Kyk gerus al is die net vir die 3 girls....

Duplicity - 6/10

Duplicity kon beter gewees het - die spanning tussen Julia en Clive is nie vir my so tasbaar as met van sy ander flieks nie. Die dialoog is redelik skerp, iets waarin hierdie tipe van flieks moet in uitstaan. Mens kan dit gerus op DVD kyk, ek het dit op die vliegtuig tussen OR Tambo en Munich gesien, oppad na Istanbul vir EURO-SIW 2009.

Die dialoog is wel skerp en seker darem so effens gelaaid tussen ou Clive en Julia, maar nie vir my goed genoeg om die film te red nie. Dit is voorspelbaar, en Clive se ietwat oordrewe spel tegniek, wat baie nuut en vars in Closer was, raak nou oud. Dis tyd dat hy 'n nuwe aanslag kry. Julia was ook nie op haar beste nie. Ek dink haar hoogtepunt was met Erin Brockovich

Wanted - 6/10

Wanted verdien seker nie 'n 6 nie, maar ek moes bloot oor hierdie ouens oor daai drempel van fisika kan beweeg deur koeels om hoeke te laat kan vlieg. Hierdie is maar 'n geen-brein aksie fliekie. Angelina werk redelik goed in haar rol. Alleen op die bank! Bella is weg op 'n werk-ding.

Superman III (1983) - 7/10

Ja wat, net soos Superman II, kan ek hierdie een nie objektief beskou nie. Veral nie dat hulle rekenaars so boosaardig slim kan laat lyk nie... Saam met die twee manne op die bank. Ai, dit bring ou verlore dae weer op....

The Promotion - 7/10

Vrek, The Promotion is net so pynlik om te kyk as wat die mense daarin se lewens is. Dit wys die uiterste trap van die dag-to-dag rotresies, maar op 'n heel ander vlak as die manne heel bo. Hierdie is in 'n amper sinlose bestaan omgewing, met soveel dinges wat opgevreet moet word, net om daardie volgende vlakkie te haal. Moet hierdie nie kyk as jy dalk enigsins depressief oor jou werk voel nie....of miskien dan wel, want dit sal jou dalk net opbeur om te sien hoe sleg ander dit regtig kan he^. Vir die ietwat meer onderskeidende fliekganger maar tog toeganklik met die klein gevaar van verveling vir ouens wat aksie in hul flieks verwag. Saam met Bella op die bank.

Jack and Jill vs the World - 4/10

Hierdie is maar net nog 'n patroontjie fliekie, en is beslis ondergemiddeld. Dit is 'n tjiekfliek, wat ek normaalweg ook kan geniet, maar darem net te voorspelbaar. Saam met Bella op die bank. Nie regtig aan te bevele nie. Ek wou dit eers 'n 3 gee, maar Bella het gese^ dis darem nie so sleg nie....

Griet en Pieter*

Griet en Pieter, met 'n watergieter,

Klim die berg op 'n draf,

Maar Pieter gly en Griet daarby,

Hul kom bolmakiesies weer af.

* Uit Aandstories vir Kleuters, Human & Rousseau

Dan van www.famousquotes.me.uk:

Jack and Jill went up the hill to fetch a pail of water

Jack fell down and broke his crown

And Jill came tumbling after.

Up got Jack, and home did trot As fast as he could caper

He went to bed and bound his head

With vinegar and brown paper.

French (history) connection!

The roots of this child's nursery rhyme is in France and the Jack and Jill referred to are Louis XVI who was beheaded (lost his crown) followed by his Queen Marie Antoinette (who came tumbling after). The words and lyrics were made more palatable for the nursery by giving it a happy ending and has further been altered by the passage of time - the actual beheadings occurred in 1793. The first publication date for the lyrics of this nursery rhyme is 1795 which tie-in with the history and origins.

Superman II (1980) - 7/10

Superman II kan ek sekerlik nie heeltemal objektief beskou nie, omdat ek as klein laaitie in die Astra op Pietersburg gesien het. Toe het ek gedink dit is die beste moewie ooit. Ek het dit weer saam met my twee gekyk, en dit weereens baie geniet. Dit het darem die toets van tyd redelik deurstaan, maar nou ja, dit lyk tog maar ook baie sewentigers. Ek gaan sommer nou die tema musiek as my sel se luitoon laai....

Ice Age (3): Dawn of the Dinosaurs - 5/10

Wel, hierdie weergawe van die Ice Age reeks is baie goed in terme van grafika, en die storie is goed, maar daar is vir my niks nuuts aan nie - dit is lekker om te kyk saam met die kinders, want hulle lag lekker vir al die fisiese grappies, en leef in die storie in, maar die volwasse vlak is ietwat dunnerig, alhoewel teenwoordig. Hulle beeld al die stadiums van 'n verhouding redelik goed uit met die twee wat so lekker baklei oor die akker, en maak dan ook kommentaar oor die geveg wat jy liewers mee sal aangaan net omdat jy dit ken, en nie noodwendig wil verander van omgewing nie. Saam met die familie en die Botts in die teater.

Ghost Town - 7/10

Net die naam Bertam Pincus laat mens al lag in Ghost Town. Die film het baie kort gedraai op die kring hier by ons, en is regtig 'n romcom wat onderwaardeerd is. Dit is regtig snaaks, met ten minste 4 tonele waar mens dit lelik kan verloor - die hond, so groot soos 'n perd, die mummie se manlike trots, Pincus se gebrabbel en dan die oormekaarpraat stukkie in die hospitaal. 'n Baie lekker kykfliek, en nie die gewone tjiekfliek nie. Saam met Bella op die bank. Aan te bevele wanneer jy iets meer as net gewone komedie soek. En Tea maak dit ook die moeite werd - sy word darem baie mooi oud....

Are We Done Yet - 4/10

Lekker kinder fliekie, en ook vir mense wat 'n fikser-upper wil koop as huis.... Tweede keer saam met die familie op die bank.

Surfer, Dude - 6/10

Surfer, Dude - nou ja, wel, wat kan mens meer se^ as: Dooooode. Ek het 'n kort resensensie gelees voordat ons die DVD gekyk het, en het nie veel hoop gehad vir 'n goeie of ten minste kykbare fliek nie. Die fliek was egter verassend, en alhoewel dit amper die pseudo-dokumentere pad volg, is dit tog interessant. Mens kan amper se^ die fliek ondersoek die outentieke surfer mentaliteit en filosofie. Die meeste dames val amper flou by aansig van ou M se borskas, en in hierdie fliek is dit sekerlik 99% op die skerm. Daar is egter darem twee geleenthede waar die manne ook kan smul aan surfer babes lyfies....Wat wel interessant vir my in die film was, was hoe hulle die see, en meerendeels, die seewater uitgebeeld het. Let ook op hoe hulle die water laat klink as dit oor die surf borde vloei - Dit skep 'n amper verleidende teenwoordigheid, soveel so dat mens net wil gaan swem in die see. Nou. Dadelik. Die akteurs is redelik geloofwaardig in hul rolle, en is seker so titseltjie oordrewe. Saam met Bella op die bank. Aan te bevele as jy rustig voel, en lus is vir iets anders as die gewone DVD.

Dr Dolittle 2 - 4/10

Dr Dolittle II is nie te slegte familie vermaak nie, maar beslis meer gemik op die kleinspan. Saam met die hele familie op die bank.

Hond se Dinges - 4/10

Hond se Dinges is een van die beter slapstick-tipe Afrikaanse komedies, met 'n heel volgbare storielyn. Moet nie die jaar se beste verwag nie, en dit is ook glad nie gemik op die kunssinnige fliekganger nie...Daar is genoeg bo en onder die belt grappe. Daar is goeie Suid Afrikaanse akteurs in, dus is dit nie heeltemal 'n budget-beater nie. Frank Opperman speel dalk so ietwat oordrewe, in vergelyking met die res, maar dit pas seker ook dan goed by die intriges en so. Wat ook baie help, in vergelyking met Poena is Koning, Saam met Bella op die bank. Aan te bevole vir daardie Vrydagaande.

The New World - 6/10

The New World met Colin Farrell is bietjie meer die Pocanhontas vir die denkende fliek-ganger. Die musiek in die fliek is baie mooi, en al die natuur tonele baie gepas - dit is egter vir my net 'n titseltjie te stadig. Moet se^ ek was baie moeg, want het die oggend die Dullstroom MTB Winter Challenge gery.... Farrell is nie my gunsteling akteur nie, maar speel heel aanvaarbaar, sowel as die Indiaanse meisie. Saam met Bella op die bank.

The Pink Panther - 6/10

The Pink Panther met Steve Martin is werklik waar snaaks - ook die tweede keer. Het hierdie gesien toe dit op die kriung begin draai het in SA, maar nou weer saam met die hele gesin op die bank. Die laaities kraai van die lag vir al die fisiese grappe. Martin is seker hier en daar bietjie te oordrewe, maar doen 'n baie goeie inspekteur. Ek het die tweede weergawe nog meer geniet. Hit dit ook so rukkie terug saam met die kinders gesien. Nog 'n lekker alternatief as mens nie te hard wil dink in die fliek nie.

Marley & Me - 6/10

Marley & Me is nouwel 'n volbloed Hollywood fliekie, maar is tog heel kykbaar, veral Jennifer....en veral wanneer sy vir Owen sy verjaardag present oorhandig... Storie is maar sterk sentimenteel, maar ouers kan beslis met die impak van kinder-keuses identifiseer. Dit is dan ook wat die fliek geslaagd maak, want dit skep 'n goeie geloofwaardige prentjie van die impak - beide honde en kinders. Saam met Bella op die bank. Aan't beveel vir aande wanneer jy net lekker wil ontspan voor die skerm, en nie noodwendig hard wil dink nie.

Funny People I en II - 7/10

Ek dink Funny People I en II was waarskynlik baanbrekers films. Hulle is nie so snaaks soos die Leon Schuster moewies nie, alhoewel hy in II self speel.... Moet se dat die springmat toneel seker een van die bestes is. Dit bly snaaks, maak nie saak hoe jy daarna kyk nie. Saam met die hele familie op die bank.

The Gods must be Crazy II - 9/10

Vir 'n Suid-Afrikaanse produksie in die jare wat dit vrygestel is, is hierdie 'n tydlose klassieke film. Dit is eenvoudig puik en een van my absolute gunstelinge. Dit is ook beter as die eerste een, wat op sy eie net so goed is. Ten sterkste aan te beveel vir daai Vrydagaand pooped gevoel. Ek het dit ook oorspronklik as nuwe vrystelling in Pietersburg gesien - nog in die Astra teater... Wat mens ook byval is hoeveel mens kan oordra sonder woorde. Veral waar die klein familie herenig. Saam met die hele familie op die bank hierdie slag. Ek gaan ook beslis die een aanskaf, net soos die eerste.

My Sassy Girl - 3/10

Nee, wat, My Sassy Girl maak dit nie....Dit is een van daardie fliekies wat in die voorprent lyk asof dit 'n vlakkie beter as die normale chick flick gaan wees, maar wat dan heeltemal teleurstel. Die karakters is net nie geloofwaardig in hulle weergee van emosies nie. Baie ligte vermaak as jy effens breinloos voel. Saam met Bella op die bank.